L’associacion

Centre Occitan de Recèrca, de Documentacion e d’Animation Etnograficas

Espelida en octòbre de 1979, l’associacion òbra a la conservacion e la valorizacion del patrimòni cultural occitan.
Sas activitats s’espandisson dins mantuna direccion : recèrca, salvagarda e documentacion, edicion e difusion, formacion e creacion.

Recèrca

L’associacion desvolopa un important trabalh de recèrca etnologica e etnomusicologica en Occitània, que tòca las populacions occitanas mas tanben las comunautats immigradas. Las recèrcas nòstras s’alargan tanben al Portugal, al Brasil e dins maites airals del mond.

Salvagarda e documentacion

Lo centre de recèrca recampa l’ensemble dels fons documentaris reculhits e numerizats (environ 7 000 oras de collectatge sonòr, 40 000 imatges, de documents audiovisuals e manuscrits) tanplan coma un molon d’obratges e fonogramas editats que concernisson las culturas minorizadas e las tradicions oralas del mond entièr. L’ensemble del fons documentari es repertoriat, informatizat e consultable per totes.

Édicion e difusion

A costat de las recèrcas, l’associacion realizèt mantunas publicacions particularament dins l’encastre de la colleccion « Mémoires sonores » que compta d’uèi mai de setanta parucions : caissetas, libres, disques, films…
Son disponiblas en version bilenga (francés/occitan) e adujan plan a la difusion de la cultura occitana. D’autras colleccions soguèron tanben creadas coma « Cosina nòstra » (libres de recèptas occitanas), « Actes de colloque« , « Virolet » (contes musicals pels dròlles), colleccion « La Talvera » (disques del grop)…

Veire tot lo catalòg [FR].

Formacion

L’associacion organiza d’animacions pels mainatges, d’estagis de formacion a l’entorn de la lenga occitana, de las danças, del cant, dels instruments de musica. Prepausa tanben de conferéncias, de collòquis sus de sicuts ligats a sas recèrcas e mantuna mòstra sus diferentas tematicas… En 2011, l’association crompèt un novèl local batejat l’Ostalon, çò que li permet d’aculhir los gropes per las animacions escolaras, e lo public pels collòquis, e las conferéncias. L’Ostalon se vòl tanben un luòc d’expausicion e un espaci documentari dubèrt al public.

Ne saber mai sus las animacions.
Ne saber mai sus las exposicions.

Créacion

Lo grop de musica La Talvera, tot en s’apevant sul repertòri tradicional occitan, s’estaca a la creacion d’un repertòri musical e poetic enrasigat dins lo mond actual. En mai del cant, los instruments utilizats son la craba (cornamusa de Montanha negra), lo graile (autbòi dels Monts de La Cauna), lo pifre, la clarigòla…

Botiga

Dubèrta tota l’annada (23 Carrièira bèla del relòtge, 81 170 Còrdas)

Oraris :
– del diluns al divendres : 9o-13o, 14o-18o (ivèrn) o 19o (estiu)
– dissabte : 9o-13o, 14o-18o (ivèrn) o 10o-13o, 14o-19o (estiu)
– dimenge (estiu e vacanças) : 10o-13o, 14o-19o