12 Nov Legendas d’Occitània, un recuèlh a paréisser en febrièr
Descobrir o tornar descobrir un país a travèrs las legendas…
Viatjar per l’imaginari occitan, al mai pròche de nòstras rasigas…
La particularitat del recuèlh presentat aicí es d’amassar de legendas eissudas en màger part de la tradicion orala, collectadas dempuèi mai de 40 ans dins l’encastre de l’associacion CORDAE La Talvera o per d’autres cercaires, dins l’ensemble de la region Occitània, País catalan inclús.
I traparetz de racontes que se referisson a un temps mitic, ont lo Diables, los geants e la Vèrge, cadun son torn, faiçonavan lo païsatge, de legendas istoricas que s’escalonan dels primièrs sègles juscas a la Revolucion francesa, mas tanben de legendas mai contemporanèas (del sègle XIX duscas a uèi) pobladas de lops, bandits e femnas salvatjas… A flotejar entre çò real e çò imaginari, çò factual e çò ficcional, e entre lo monde dels òmes e lo monde dels dieus, la legenda conta gaireben totjorn l’istòria o la fortuna de las comunautats en raportant d’evenements enrasigats dins la vida locala.
Parucion en febrièr de 2023
Autor : Daniel Loddo ; fotografe : Dominique Delpoux
Òbra en color bilingüa francés/occitan, format 19,5/28 cm,
De 312 paginas amb de fotografias nombrosas en color.
En venda al prés public de 29 €