Lo grop
Dempuèi la debuta, lo grop La Talvera explòra de contunh lo repertòri occitan, tot en obrant a la creacion d’un repertòri musical e poëtic enrasigat dins lo monde actual.
Occitana, mas totjorn dins una dubertura sul monde, la musica de La Talvera pren sas raices dins la tradicion mas farga de ligams dins la contemporaneïtat en getant de ponts, d’una generacion a l’autra, d’un continent a l’autre, d’un temps a un autre.
D’uèi, La Talvera es un grop, solide, de musica occitana, mas tanben inclassificable e mirgalhat, ni ragga, ni world, ni solament tradicional, enriquesit per sos mantunhs rencontres e viatges…
Veire las datas de La Talvera a venir
La Talvera,
Es la broa d’un camp que se laura pas, ont las èrbas fòlas e salvatjas se costejan e se mesclan…
Es dins aquel espaci de libertat que puèlhan las cançons de Daniel Loddo e que gisclan, charran e tustan, s’es necessari, se rison , s’atissan, desrevelhan e brandisson. La Talvera muda al crosièr de las culturas, dels estiles musicals, dels lengatges…
Los tornam trobar a la virada dels camins e al fial de las annadas en companhiá de Massilia Sound System e Moussu T, de musicians bretons, e del brasilian Silvério Pessoa…
Per La Talvera, la musica tradicionala, luènh d’èsser immuabla e empeirada, es lo luòc de totes los possibles, de totas las batèstas e de totas las revòltas.
Per çò que la cançon del pòble a lo meteis sens de pertot…
Los musicians
Daniel LODDO (autor-compositor) : acordeon diatonic, craba, boha, cant…
Céline RICARD : cant, pifre, graile
Fabrice ROUGIER : clarinetas, saxofòn
Jean-Pierre VIVENT : batariá, percussions
Aelis LODDO : violon e cant
Mathieu PHAURE : son
Extraches audiò
Las formulas
CONCERT(durada 1 a 2 oras) : repertòri de creacion e tradicional occitan. Aquel concèrt pòt èsser « festiu », es a dire que lo public es quilhat e dança a l’encòp.
BALÈTI(durada 1 à 4 oras) : repertòri de creacion e tradicional occitan. Las danças d’Albigés, de Roergue, de Carcin e d’autras regions occitanas, pòdon èsser mostradas e explicadas. La mager part se pòdon dançar quitament sens aprendissatge
CONCERT-BALÈTI (mescla de las doas formulas precedentas)
ESPECTACLES : dos espectacles que barrejan musica, contes et projeccion visuala son venguts enriquesir las proposicions del grop. L’espectacle Lo Sòmi de Coquinon (creat al torn del libre-CD “Turlututú 2”) pensat pels enfants ; e l’espectacle Del temps que los ausèls parlavan que proposa un viatge encantarèl per l’univèrs dels ausèls.
PASSA-CARRIÈRA : amb d’instruments tradicionals (craba, graile, pifre, clarineta, percussions)
ANIMACIONS : en direccion dels toristas, dels vièlhs, dels pichons, en acostica o sonorisada, divèrsas formulas son possiblas, ont lo conte costeja la musica o la dança…
Possibilitat de concèrts o balètis pels enfants.
