Lo grop
Dempuèi la debuta, lo grop La Talvera es plan enrasigada dins la tradicion occitana mas luènh d’èsser immudabla e immobila, prepausa de cançons de creacion en occitan a l’encòp poeticas e reivendicativas, a l’escota dels problèmas politics e socials de l’epòca acutala, emprenchadas de nombroses viatges, collectatges e recontras del grop.
Cançonièrs tant coma cantaires, animators tant coma musicians, los de La Talvera son de vertadièrs empusaires, capables de far fremir los pichons emponts coma los grands festenals.
Entre acordeon e craba, graile e pifre, banjo, percussions, violon e vozes, los musicians de La Talvera convidan a la dança. Cossí es penós de resistir a aquestes ritmes endiablats de borrèias, branles, farandòlas e maitas danças occitanas…
Veire las datas de La Talvera a venir
La Talvera,
Es la broa d’un camp que se laura pas, ont las èrbas maridas e salvatjas se costejan e se mesclan…
Es dins aquel espaci de libertat que puèlhan las cançons de Daniel Loddo e que gisclan, charran e tustan, s’es necessari, se rison , s’atissan, desrevelhan e brandisson. La Talvera muda al crosièr de las culturas, dels estiles musicals, dels lengatges…
Los tornam trobar a la virada dels camins e al fial de las annadas en companhiá de Massilia Sound System e Moussu T, de musicians bretons, e del brasilian Silvério Pessoa…
Per La Talvera, la musica tradicionala, luènh d’èsser immuabla e empeirada, es lo luòc de totes los possibles, de totas las batèstas e de totas las revòltas.
Per çò que la cançon del pòble a lo meteis sens de pertot…
Los musicians
Daniel LODDO (autor-compositor) : acordeon diatonic, craba, boha, cant…
Céline RICARD : cant, pifre, graile
Aelis LODDO : violon e cant
Zoé DURAND : banjo
Mathieu PHAURE : son
Extraches audiò
Las formulas
BALÈTI (durada 1 à 4 oras) : ambé Balèti blues, lo grop prepausa de cançons tradicionalas e de creacion en occitan, a l’encòp poeticas e reivindicativas , e marcadas per sos viatges nombroses, collectatges e encontres. Las danças d’Albigés, de Roergue, de Carcin e d’autras regions occitanas, pòdon èsser mostradas e explicadas. La mager part se pòdon dançar quitament sens aprendissatge.
BALÈTI PELS ENFANTS : Fòrts de lor experiéncia al prèp dels publics escolars e de lor volontat de transmission, los musicaires/animators de La Talvera se carran de prepausar de bals a destinacion dels enfants (amb o sens los parents).
CONCERT (durada 1 a 2 oras) : repertòri de creacion e tradicional occitan. Aquel concèrt pòt èsser « festiu », es a dire que lo public es quilhat e dança a l’encòp.
ESPECTACLES : espectacle que barreja musica, contes et projeccion visuala, Del temps que los ausèls parlavan prepausa un viatge encantarèl per l’univèrs dels ausèls.
PASSA-CARRIÈRA : Buf en Tust es una formacion percutenta e bufanta que, del temps de sas peregrinacions, regaudís e entraïna amb ela lo public qu’esita pas a dançar e bolegar.
CONTES : Cont’a dos es un espectacle de contes tradicionals o inventats, illustrats de cançons, de musicas e de païsatges sonòrs a partir de mimologismes, de bruches, d’instruments pichons. De qué vos far viatjar dins l’univèrs de la cultura occitana.
ESTAGIS : estagi de danças (de Tarn, Avairon o Carcin) o de cant ( repertòri de cançons tradicionalas de Lengadoc).
ANIMACIONS : En acostica o sonorizat, divèrsas formulas son possibles ont lo conte costeja la musica o la dança… Per mai d’un public (tot public, enfants, toristes, vielhs)
